![](https://orlofgk.is/wp-content/uploads/2024/01/Panorama-Vestmannaeyjar-1024x172.jpg)
17. ágúst 2024
Fararstjóri: Kristín Jóhannsdóttir
Víst er fagur Vestmannaeyjabær og Eyjamenn svo sannarlega höfðingjar heim að sækja eins og við fáum að upplifa í þessari ferð. Kristín Jóhannsdóttir verður fararstjóri okkar en hún er uppalin og búsett í Vestmannaeyjum, hefur lengi séð þar um ferða- og markaðsmál og er nú forstöðukona gosminjasafnsins Eldheima. Einnig var hún fararstjórinn okkar í aðventuferðinni til Berlínar og Dresden 2023. Hún þekkir hvern krók og kima í Eyjum. Eyjaklasinn Vestmannaeyjar samanstendur af 15 eyjum og 30 skerjum og dröngum en Heimaey er eina eyjan þar sem búið er á allt árið um kring.
Brottför frá Garðatorgi um kl. 08:00 en farið verður með Herjólfi frá Landeyjahöfn kl. 10:45. Sigling með Herjólfi er bæði ánægjuleg og þægileg útsýnisferð sem tekur rúman hálftíma. Við komuna til Eyja tekur á móti okkur fararstjórinn okkar Kristín Jóhannsdóttir og verður ekið smá um bæinn áður en tekin verður hádegishlé. Í frítímanum í hádeginu getum við gengið um bæinn, fengið okkur eitthvað að snæða eða fara heimsækja Sagnheima sem er sögusafn Eyjanna. Þá er einnig tilvalið prófa bjórinn sem Brothers Brewery framleiðir á staðnum en reyndar opna þeir ekki fyrr en kl. 14. Á þeim bar má sjá gamla barinn úr Súlnasalnum.
![](https://orlofgk.is/wp-content/uploads/2024/01/Stafkirkjan-i-Vestmannaeyjum.jpg)
Eftir frjálsa tímann fer fararstjórinn okkar með okkur í skoðunarferð um Eyjarnar en í Vestmannaeyjum er að finna einstakar náttúruperlur. Við skoðum meðal annars Stórhöfða, Eldfell, Herjólfsdal, Skansinn, Stafkirkjuna, glæsilega smíð, sem reist var í tilefni af 1000 ára kristnitökuafmæli Íslendinga árið 2000 og var gjöf frá Norðmönnum.og margt fleira og mun fararstjórinn rifja upp merka sögu Eyjanna.
![](https://orlofgk.is/wp-content/uploads/2024/01/Eldheimar-1024x191.jpg)
![](https://orlofgk.is/wp-content/uploads/2024/01/Magnus-R.-Einarsson.jpg)
Seinni part dags verður ekið að Eldheimasafninu sem geymir sögu og minjar frá tveimur örlagaríkum eldgosum. Þar má nefna Heimaeyjargosið árið 1973 sem hrakti heilt byggðalag á flótta og eyðilagði heimili um 2000 manna. Í Eldheimum er einnig sýnt og sagt frá þróun Surtseyjar, einnar yngstu eyju í heimi, sem bættist í hóp Vestmannaeyja árið 1963. Eftir að við höfum skoðað safnið hittist hópurinn í veitingasal safnsins. Þar verður borinn fram kvöldverður og sannkölluð Eyjastemning með lifandi tónlist og þær sem vilja geta sungið með.
Nú er komið að heimferð kl. 18:45 verðir ekið að höfninni. Siglt frá Eyjum með Herjólfi til Landeyjahafnar kl. 19:30 og þaðan ekið í bæinn.
Verð á mann kr. 20.000
Gjaldið þarf að greiðast innan 7 daga frá staðfestingu á ferðinni og er óafturkræft.
Konur sem búa í öðru sveitarfélagi en okkar umdæmi geta farið í ferðina ef að er laust pláss, en verða sjálfar að sækja um niðurgreiðslu til orlofsnefndar í sínu umdæmi.
Vinsamlegast athugið að breytingar geta orðið á ferðum vegna veðurs
Innifalið:
- Rútuferð til og frá Landeyjarhöfn
- Sigling með Herjólfi, til og frá Vestmannaeyjum
- Allar skoðunarferðir með rútu samkvæmt ferðalýsingu
- Aðgangseyrir að safni Eldheima
- Kvöldverður frá Einsa Kalda á Eldheimum
- Skemmtiatriði í Eldheimum
- Íslensk fararstjórn
Ekki innifalið:
Annað en það sem upp er talið í ferðalýsingunni
Forfallatrygging er ekki innifalin í staðfestingargjaldi.
Ferða- og forfallatryggingar eru á eigin ábyrgð.
Athugið sérstaklega:
Í ferðum á vegum Húsmæðraorlofsins þurfa konur að vera færar um að geta komist leiðar sinnar óstuddar, því alltaf þarf að ganga eitthvað í skoðunarferðum en gönguleiðir eru oftast ekki mikið á fótinn né mjög langar.
Sæktu um ferðina með því að smella hér